Кеңес үкіметінің қылышынан қан тамып тұрған тұста алып шаһар Алматыда қазақ тілінде оқытатын жалғыз №12 қазақтың тұңғыш зиялы мектебі болды. Өзінің қазақ деген анықтамасына сай бүкіл алаштың бет-бейнесі, арман-мүддесі, ар-намысы болып танылды. Осындай айтулы мектепке балаларды дайындайтын балабақша болмады ол кезде. Қазақтың қаракөз балалары орыс тілінде тәрбиеленіп, орыс тілінде білім алуға мәжбүр болды. Тарихтың сол бір кезеңінде қараңғылық көгінде жарық жұлдыз болып жанған Бәшен Баймұратова сынды зиялыларымыз тұңғыш қазақ балабақшасын ашуға белсене кірісіп, үлкен үлес қосты.